भारत आणि जपान या दोन देशांमधील मैत्री केवळ मुत्सद्देगिरीपुरती मर्यादित नसून ती संस्कृती, अध्यात्म आणि आत्मिक प्रेमाच्या भक्कम धाग्यांनी विणलेली आहे. याच जिव्हाळ्याच्या नात्याची साक्ष देणारा एक अत्यंत भावूक आणि महत्त्वपूर्ण क्षण मुंबईत पाहायला मिळाला. जपानचे माजी पंतप्रधान दिवंगत शिंजो आबे यांच्या पत्नी आकी आबे यांनी महाराष्ट्राचे मुख्यमंत्री देवेंद्र फडणवीस यांची सदिच्छा भेट घेतली. महाराष्ट्राच्या गतिमान विकासात जपानचे नेहमीच मोठे योगदान राहिले असून, मुख्यमंत्री फडणवीस यांच्या नेतृत्वाखालील महाराष्ट्र आणि जपान यांच्यातील विश्वासार्ह नाते या भेटीमुळे पुन्हा एकदा अधोरेखित झाले आहे.
दिवंगत शिंजो आबे यांचे भारतावर, विशेषतः महाराष्ट्रावर असलेले प्रेम सर्वश्रुत आहे. त्यांच्या निधनानंतरही आबे कुटुंबीय आणि भारतामधील हा जिव्हाळा तितकाच ताजा आहे, याची प्रचिती या भेटीदरम्यान आली. मुख्यमंत्री देवेंद्र फडणवीस यांनी आकी आबे यांचे अत्यंत आदरपूर्वक आणि स्नेहाने स्वागत केले.
“भारताची पूजा आणि जपानची परंपरा यात विलक्षण साम्य!” – आकी आबे या भेटीदरम्यान आकी आबे यांनी नुकत्याच केलेल्या काशी आणि वाराणसी दौऱ्याचे अत्यंत भावस्पर्शी अनुभव मुख्यमंत्री देवेंद्र फडणवीस यांच्याशी शेअर केले. वाराणसी हे जगातील सर्वात प्राचीन, पवित्र आणि चैतन्यमय शहर असल्याचे नमूद करत त्या म्हणाल्या:
“काशीजवळ एका आध्यात्मिक ठिकाणी उपस्थित असताना मी संस्कृत मंत्रोच्चार, पूजाविधी आणि देवाला नैवेद्य अर्पण करण्याच्या पद्धती अगदी जवळून अनुभवल्या. त्या क्षणी मला जाणवले की, भारताच्या या प्राचीन विधींमध्ये आणि जपानच्या पारंपरिक धार्मिक प्रथांमध्ये कमालीचे साम्य आहे. दोन्ही संस्कृती निसर्ग, पूर्वज आणि विश्वातील सकारात्मक ऊर्जेला जोडणाऱ्या आहेत. हा केवळ योगायोग नसून भारत आणि जपानमधील सहस्र वर्षांच्या सांस्कृतिक व आध्यात्मिक नात्याचा जिवंत पुरावा आहे.”
आकी आबे यांनी व्यक्त केलेल्या या भावनांमुळे संपूर्ण वातावरण भावूक झाले होते. भारताच्या समृद्ध वारशाबद्दल त्यांनी व्यक्त केलेल्या गौरवोद्गारांचे मुख्यमंत्री फडणवीस यांनी मनापासून स्वागत केले.
मुख्यमंत्री फडणवीस यांच्या नेतृत्वावर जपानचा दृढ विश्वास मुख्यमंत्री देवेंद्र फडणवीस यांनी नेहमीच जपानसोबत महाराष्ट्राचे औद्योगिक, तंत्रज्ञान आणि सांस्कृतिक संबंध नव्या उंचीवर नेले आहेत. मग ते मुंबई-अहमदाबाद बुलेट ट्रेन असो, मेट्रो प्रकल्प असोत किंवा जायकाचे (JICA) सहकार्य असो—फडणवीस यांच्या कार्यकाळात हे संबंध नेहमीच सुवर्णकाळात राहिले आहेत. आकी आबे यांच्या या भेटीमुळे महाराष्ट्राच्या नेतृत्वाप्रती जपानचा असणारा स्नेह आणि सन्मान पुन्हा एकदा जगासमोर आला आहे.
या भावनिक आणि स्नेहपूर्ण बैठकीदरम्यान जपानचे उच्चस्तरीय शिष्टमंडळ तसेच मुख्यमंत्र्यांचे प्रधान सचिव डॉ. श्रीकर परदेशी उपस्थित होते. दोन्ही देशांमधील मैत्री अशीच निरंतर वृद्धिंगत होत राहो, अशा सदिच्छा यावेळी व्यक्त करण्यात आल्या.