मुंबई: मुंबईतील ऐतिहासिक ऑगस्ट क्रांती मैदानात पार पडलेल्या आंदोलनात सहभागी झाल्यामुळे बॉलिवूड अभिनेते इम्रान खान नव्या वादात अडकले आहेत. भारतीय जनता पक्षाचे (भाजप) नेते किरीट सोमय्या यांनी इम्रान खान यांच्या नागरिकत्वावरून आक्षेप नोंदवला असून, परदेशी नागरिकाला भारतात अशा प्रकारे आंदोलनात उतरण्याचा अधिकार कसा असू शकतो, असा थेट सवाल केला आहे.
इम्रान खान हे अमेरिकेचे (US) नागरिक
इम्रान खान यांचा जन्म अमेरिकेतील विस्कॉन्सिन (मॅडिसन) येथे झाला असून, जन्माने ते अमेरिकन (US) नागरिक आहेत. भारतात बॉलिवूडमध्ये सक्रिय असले तरी त्यांच्याकडे अमेरिकेचा पासपोर्ट आणि नागरिकत्व आहे. याच मुद्द्यावरून किरीट सोमय्या यांनी त्यांच्या सहभागावर प्रश्नचिन्ह उभे केले आहे.
पोलिसांकडे कारवाईची मागणी किरीट सोमय्या यांनी सोशल मीडिया प्लॅटफॉर्म 'X' वर माहिती दिली की, त्यांनी मुंबईचे सहपोलीस आयुक्त मनोज कुमार शर्मा यांना अधिकृत पत्र पाठवले आहे. एका परदेशी नागरिकाने भारतातील आंदोलनात सहभाग घेतल्याप्रकरणी खान यांच्यावर योग्य ती कायदेशीर कारवाई करावी, अशी मागणी त्यांनी केली आहे. या घडामोडीनंतर वृत्तसंस्थेने इम्रान खान यांच्याशी संपर्क साधण्याचा प्रयत्न केला, परंतु त्यांची बाजू समोर येऊ शकली नाही.
"मी या शहराचा नागरिक म्हणून आलोय" – इम्रान खान
पोलिसांनी ताब्यात घेण्यापूर्वी प्रसारमाध्यमांशी संवाद साधताना इम्रान खान यांनी आपली भूमिका मांडली होती. ते म्हणाले, "मी येथे एका नागरिकाच्या नात्याने आणि याच शहरात राहणारा एक रहिवासी म्हणून आलो आहे. लोकांच्या हालचालींवर आणि फिरण्याच्या स्वातंत्र्यावर (Freedom of Movement) अचानक का बंधने आणली जात आहेत, तसेच जनतेचा आवाज का दाबला जात आहे, हे पाहण्यासाठी मी येथे उपस्थित आहे." त्यानंतर पोलिसांनी त्यांना आंदोलनस्थळावरून ताब्यात घेतले होते.
कायद्यानुसार परदेशी नागरिकांना भारतात आंदोलनाचा अधिकार आहे का?
या मुद्द्यावर कायदेशीर मत मांडताना भाजपाचे युवा वकील कार्यकर्ते राज सराफ यांनी सांगितले की: भारतीय संविधानाच्या कलम १९ अंतर्गत भाषण, अभिव्यक्ती आणि एकत्र येण्याचे मूलभूत हक्क (Fundamental Rights) प्रामुख्याने भारतीय नागरिकांना मिळालेले आहेत. त्यामुळे भारतीय धोरणांविरोधात देशात आंदोलन करण्याचा मूलभूत अधिकार परदेशी नागरिकाला नसतो